مقلوبة فراخ على الطريقة الشامية.

مقلوبة الفراخ على الطريقة الشامية
المقادير:

1/ 2 كيلو أوراك فراخ
1/ 2 كيلو باذنجان رومي
قرفة ناعمة وعيدان
2 1/ 2 كوب ميه
2 1/ 2 كوب أرز
4 ملاعق زبدة
ملعقة بهارات
ملعقة حبهان
بصلة كبيرة
ملح وفلفل
ورق لورا

الطريقة:
1- أول حاجة تقطّعي الأوراك قطع متوسطة، وتقطعي البصلة مكعبات صغيرة، وتحطيهم في الزبدة مع الفراخ، وتشوّحيهم على النار، وحُطّي معاهم ورق اللورا والقرفة الناعمة والعيدان والحبهان وملح وفلفل، وسيبيها على النار وقلبيها من وقت للتاني.

2- قشّري الباذنجان، ويُفضّل إنك تسيبي فيه أجزاء من القشر علشان يدي لون للأرز، وقطعيه شرايح، واقليه في الزيت نصف قلية.

3- بعد ما الفراخ تتشوح كويس زوديها ميه، وغطيها وسيبيها على النار مرة كمان، ولو حسيتي إن الشوربة محتاجة تتبّل تاني تقدري تتبليها على ذوقك.

4- رُصّي الباذنجان في حواف الحلة، وصفي كمية من قطع الفراخ من الشوربة، وحُطّيها مع الباذنجان، وبعدين حُطّي الأرز على الفراخ.

5- اسقي الأرز بالشوربة اللي عندك وباقي كمية الفراخ المتبقية، وحُطّيه على النار لحد ما الأرز يستوي.

6- بعد ما المقلوبة تستوي اقلبي الحلة في طبق التقديم وقدّميها.. بالهنا والشفا.